UFAZ tələbəsi beynəlxalq elmi proqramda xüsusi fərqlənmə əldə edib

UFAZ tələbəsi beynəlxalq elmi proqramda xüsusi fərqlənmə əldə edib

23 iyun – 28 iyul tarixlərində Çin Xalq Respublikasında Fudan Universiteti, Zhejiang Universiteti, Çin Elm və Texnologiya Universiteti və Nanjing Universitetinin təşkilatçılığı ilə “Gənc Tədqiqatçıların Qlobal Elmi İnteqrasiya Proqramı” (GRIPS) həyata keçirilib. 

ADNSU-nun nəzdində fəaliyyət göstərən UFAZ-dan “Azərbaycan müəllimi”nə bildirilib ki, universitetin “Fiziki kimya/Kimya mühəndisliyi” ixtisası üzrə tələbəsi Aslan Hüseynli bu proqramda iştirak edərək öz tədqiqat işini təqdim edib.

Aslan Hüseynlinin “Davamlı enerji istehsalı üçün üzvi termoelektrik materiallar” mövzusundakı elmi posteri 120-dən artıq təqdimat arasında ən yaxşı iş seçilib və proqramın elmi komitəsi tərəfindən xüsusi fərqlənmə mükafatına layiq görülüb.

Qeyd edək ki, GRIPS gənc tədqiqatçıların qlobal elmi şəbəkəyə inteqrasiyasını və onların multidisiplinar tədqiqat bacarıqlarını inkişaf etdirməyə yönəlmiş nüfuzlu elmi platformadır. Proqram çərçivəsində yüzlərlə tədqiqat işi və poster təqdimatları qiymətləndirilir, ən uğurlu işlər isə xüsusi mükafat və təqdimat imkanı qazanır.

Aslan Hüseynlinin bu uğuru elmi araşdırmaların dayanıqlı enerji həllərində tətbiqi və gənc alimlərin qlobal elmi platformalarda fəal iştirakı baxımından əhəmiyyət daşıyır.