BMU ilə Səmərqənd Dövlət Universiteti arasında əməkdaşlıq müzakirə olunub

BMU ilə Səmərqənd Dövlət Universiteti arasında əməkdaşlıq müzakirə olunub

Bakı Mühəndislik Universiteti (BMU) ilə Səmərqənd Dövlət Universitetinin (SDU) nümayəndə heyətləri arasında onlayn görüş keçirilib.

Universitetdən “Azərbaycan müəllimi”nə bildirilib ki, Özbəkistan Respublikasının ən qədim və böyük ali təhsil ocaqlarından olan SDU ilə ikitərəfli əməkdaşlığın inkişafı məqsədi daşıyan görüşdə BMU-nun beynəlxalq əlaqələr üzrə prorektoru Ətrabə Gül universitetin beynəlxalq əlaqələri, həyata keçirilən layihələr və gələcək inkişaf planları barədə geniş məlumat verib. O, BMU-nun beynəlxalq təhsil məkanında daha da möhkəmlənməsi istiqamətində atılan addımları vurğulayıb.

Öz növbəsində SDU-nun beynəlxalq əməkdaşlıq üzrə prorektoru Akmal Axatov Rustamovich ali təhsil ocağının elmi və tədris sahəsindəki fəaliyyəti, beynəlxalq əməkdaşlıq istiqamətləri barədə danışıb, tərəfdaşlığın hər iki universitet üçün faydalı ola biləcəyini deyib. Görüşdə, həmçinin iki ali təhsil müəssisəsi arasında ortaq maraq doğuran mövzular ətrafında geniş müzakirələr aparılıb və təcrübə mübadiləsinin vacibliyi qeyd olunub.

Müzakirələr zamanı SDU nümayəndələri əməkdaşlıq üçün bir sıra konkret istiqamətlər – qış və yay məktəblərinin təşkili, tələbələrdən ibarət komandaların birgə tədqiqatlar aparması, tələbə mübadiləsi proqramlarının icrası, ikili diplom proqramlarının hazırlanması və birgə layihələrin həyata keçirilməsi təklifi ilə çıxış ediblər. Tərəflər əməkdaşlığın qarşılıqlı etimada əsaslandığını vurğulayaraq, gələcəkdə birgə elmi-praktiki tədbirlərin təşkili və innovativ layihələrin reallaşdırılması istiqamətində sıx əməkdaşlıq etməyə razılaşıblar.

Görüş səmərəli dialoq mühitində keçib və iki universitet arasında əməkdaşlığın yeni mərhələsinin başlanğıcı kimi dəyərləndirilib.