Xaricdə təcrübə və 700 dollar maaş – Peşə təhsilində yeni imkanlar

Xaricdə təcrübə və 700 dollar maaş – Peşə təhsilində yeni imkanlar

Qəbələ Dövlət Peşə Təhsil Mərkəzi yalnız yerli deyil, həm də xarici ölkələrdə fəaliyyət göstərən şirkətlərlə əməkdaşlıq edir. Bu əməkdaşlığın nəticəsi olaraq hazırda 12 nəfər Türkiyənin Antalya şəhərində təcrübə keçir.

Bu barədə “Azərbaycan müəllimi”nə mərkəzin direktoru Qalib Nəbiyev məlumat verib.

Onun sözlərinə görə, tələbələrin istehsalat təcrübəsinin təşkili məqsədilə əməkdaşlıqlarını ildən-ilə genişləndirirlər. Artıq bir müddətdir ki, mərkəz bu istiqamətdə xarici şirkətlərlə əməkdaşlıqlara başlayıb: “Qəbələ Dövlət Peşə Təhsil Mərkəzi yalnız ölkə daxilində deyil, ölkə xaricində fəaliyyət göstərən şirktlərlə də əməkdaşlıq edərək tələbələrinin ayrı-ayrı ölkələrdə təcrübə keçməsinə şərait yaradır. Məsələn, Türkiyə ilə artıq 3 ildən çoxdur ki, əlaqələrimiz davam edir. Hər dərs ilinin II tədris dövründə əməkdaşlıq etdiyimiz Türkiyə şirkətlərinin nümayəndələrini dəvət edirik. Onlar Türkiyənin tanınmış 5 ulduzlu hotelləridir. Gəlib müəssisədə turizm istiqamətində təhsil alan tələbələrimizi müsahibə edirlər”.

Qalib Nəbiyev əlavə edib ki, qiymətləndirmə prosesinə yalnız Türkiyədə təcrübə keçmək arzusunda olan tələbələr cəlb olunur: “Tələbələr könüllülük prinsipi əsasında seçilir. Müsahibələrin nəicələrinə görə seçilən tələbələr Türkiyənin turizmin inkişaf etdiyi bölgələrində – Antalya, İstanbul, İzmir və başqa şəhərlərdə fəaliyyət göstərən hotellərdə istehsalat təcrübəsi keçmək və çalışmaq imkanı əldə edirlər”.

Mərkəz direktoru belə əməkdaşlıqların gözlənilən nəticələrindən də danışıb: “Bu imkan yalnız peşəkar iş mühitinə təsir etmir, həm də tələbələrimizin maddi durumlarına təsir edir. Belə ki, tələbələrimizin  nəqliyyat, qidalanma, gecələmə, sığorta və digər izafi xərcləri tərəfdaş  şirkət tərəfindən təmin edilir. Onlarla rəsmi işçi kimi müqavilə imzalanır, müddətli iş oturumu verilir və hər ay bank hesablarına 700 ABŞ dolları qədər əməkhaqqı ödənilir”. 

Qalib Nəbiyev əlavə edib ki, tələbələrin xaricdə istehsalat təcrübəsi tam nəzarətləri altında davam edir: “Onların izlənilməsi prosesi həyata keçirilir. Həftəlik, aylıq hesabatlar təqdim olunur, istehsalat təcrübəsi dövründə tərtib olunan hesabat, qeydiyyat formaları və  təqdimatları bizə göndərilir. Çünki sonda tələbələrimiz qiymətləndirilərkən həmin sənədlər nəzərə alınır və onlara sertifikatlar verilir”.