Azərbaycanda ilk dəfə rezidentlər donuz üzərində əməliyyat apardılar

Azərbaycanda ilk dəfə rezidentlər donuz üzərində əməliyyat apardılar

Ölkəmizdə ilk dəfə olaraq rezidentlərimiz üçün donuz modelində Laparoskopik Uroloji və Ginekoloji kurs təşkil edilib. Azərbaycan Tibb Universiteti və Azərbaycan Endouroloji Cəmiyyəti tərəfindən uğurla keçirilən kursda “Urologiya” və “Ginekologiya” ixtisası üzrə təhsil alan 10-a yaxın rezident iştirak edib. Kursa professor Rauf Nağıyev və Həkim Raxşəndə Əliyeva rəhbərlik ediblər.

Universitetdən “Azərbaycan müəllimi”nə verilən məlumata görə, donuz modeli üzərində laparoskopik kurslar hazırda dünyanın bir çox qabaqcıl tibbi təlim mərkəzlərində – ABŞ-nin Mayo Clinic, Cleveland Clinic, Harvard Medical School kimi iri universitet xəstəxanalarında, Almaniya, Fransada tətbiq edilir. Həmçinin İspaniya, İtaliya, Avstriya və İsveçdə, Türkiyənin tibbi universitetlərdə və xüsusi simulyasiya mərkəzlərində donuz modeli ilə uroloji və ginekoloji kurslar tədris olunur. Bu üsul Yaponiya, Cənubi Koreya, Çin və Hindistanda həm dövlət universitetlərinin, həm də özəl tibbi tədris mərkəzlərinin proqramına daxildir.

Təlim zamanı laborator şəraitdə canlı və ya kadavrik donuz üzərində laparoskopik (minimal invaziv) əməliyyatların öyrədilməsi nəzərdə tutulur. Bu metod həm cərrahların ilkin bacarıqlar qazanması, həm də təcrübəli həkimlərin yeni texnologiya və üsullara adaptasiyası üçün geniş istifadə olunur.

Donuz anatomiyasının insanın genito-urinar sisteminə və qarın boşluğu anatomiyasına müəyyən oxşarlıqları olduğuna görə bu, təlimi daha real və faydalı edir. Həmçinin gənc cərrahlar və rezidentlər ilk təcrübələrini birbaşa insanda deyil, heyvan modelində sınayaraq bacarıq qazanırlar. Təlim zamanı əl bacarıqları inkişaf etdirilir, endoskopik alətlərin istifadəsi, kameranın idarəsi, disseksiya, tikiş qoyma və qanaxmanın idarəsi kimi incə texnikaları öyrədilir. Digər tərəfdən, yeni texnologiyalara (robotik cərrahiyyə, 3D laparoskopiya) adaptasiya baxımından da əhəmiyyətlidir.

Dünyanın müxtəlif ölkələrində bu kurslarda iştirak ödənişli olsa da, Bakıda rezidentlər üçün pulsuz təşkil edilib. Gələcəkdə də bu kursların bir neçə donuz modeli və daha çox iştirakçı sayı ilə ATU rezidentləri üçün yenidən təşkil olunacağı planlaşdırılır.