ARTİ “Kenquru” ilə bağlı iddialara cavab verdi 

Azərbaycanda keçirilən “Kenquru” riyaziyyat müsabiqəsindən sonra sosial şəbəkələrdə imtahanın təşkili və şəffaflığı ilə bağlı müxtəlif iddialar səsləndirilib. İddialara əsasən, suallar əvvəlcədən bəzi şəxslərə məlum olub. Bu səbəbdən bəzi şagirdlərin imtahana daha hazırlıqlı gəldiyi irəli sürülür.

Məsələ ilə bağlı "Azərbaycan müəllimi"nin sorğusuna cavab olaraq Təhsil İnstitutundan bildirilib ki, Azərbaycanda beynəlxalq sual bazasına giriş icazəsi sadəcə bir nəfərdədir. Sualların son ana qədər məxfiliyinin qorunması və bununla da ədalətli yanaşmanı təmin etmək ARTİ-nin əsas prinsipidir: "Kenquru Beynəlxalq Riyaziyyat Müsabiqəsi hər il 100-dən çox ölkədə milyonlarla məktəblinin iştirakı ilə martın 19-da keçirilir. Bəzi ölkələrdə müxtəlif səbəblərdən fərqli tarixlər ola bilir. Bu il, məsələn, Azərbaycan, Özbəkistan və Novruz bayramında uzunmüddətli qeyri-iş günü olan digər ölkələrdə fərqli tarixlər qeydə alınıb.  

Martın 19-da keçirilən və dünyada 6 milyondan çox şagirdin iştirak etdiyi müsabiqədə sualların bu və ya digər internet resursunda yayımlanması mümkündür, bundan heç  kim sığortalanmayıb. Amma qaydalara görə, imtahandan sonra 1 ay ərzində ölkələrin rəsmi nümayəndələri tərəfindən sualların paylaşılması qadağandır. İmtahandan sonra sual kitabçaları uşaqlarda qaldığı üçün hər hansı bir ölkədə sualların qeyri-rəsmi şəkildə yayımlanması ehtimalı var".

ARTİ-nin açıqlamasında qeyd olunur ki, Kenquru Beynəlxalq Riyaziyyat Müsabiqəsində iştirak könüllüdür və nəticələri məktəbliyə xüsusi imtiyaz vermir, onun digər beynəlxalq müsabiqələrə müsabiqədənkənar buraxılması, ali məktəbə qəbul və s. güzəştləri olmur: "Kenquru Müsabiqəsi müxtəlif yaş qruplarına aid məktəblilərin öz riyazi biliyini və məntiqi düşüncə qabiliyyətini ölçməsi üçün beynəlxalq platformadır. Müsabiqənin valideynlər üçün maraqlı tərəfi övladlarının yaşlarına uyğun riyazi bilik və bacarıqların ölçülməsi, onların riyazi təfəkkür səviyyəsinin müəyyən edilməsi olmalıdır. Kenquru Müsabiqəsi yarış müsabiqəsi kimi şagirdin yüksək yer tutub qalib olmasından daha çox valideynlərin övladları ilə bağlı mövcud vəziyyəti öyrənməsini hədəfləyir".

Həmçinin bildirilib ki, sualların yayımlanmasında adı hallanan şəxs artıq açıqlama videosu yayıb və bunun imtahandan sonra və necə baş verdiyi geniş şəkildə izah edib: "Əlavə olaraq bildiririk ki, Kenquru Beynəlxalq Riyaziyyat Müsabiqəsi beynəlxalq formatda təşkil olunur və suallar mərkəzi təşkilat tərəfindən hazırlanaraq iştirakçı ölkələrə təqdim edilir. Tapşırıqlarda istifadə olunan personaj adları da orijinal mətnin tərkib hissəsidir, müxtəlif ölkələri təmsil edən neytral və universal adlardan seçilir. Yaş kateqoriyasına görə sualların hazırlanması da beynəlxalq standartlar əsasında həyata keçirilir.

Sualların Azərbaycan dilinə tərcüməsi zamanı əsas məqsəd məzmunun və məntiqin olduğu kimi qorunmasıdır. Bu səbəbdən də bir çox hallarda xüsusi isimlər (adlar) dəyişdirilmədən saxlanılır ki, tapşırığın ilkin quruluşu və beynəlxalq standartlara uyğunluğu pozulmasın.

Eyni zamanda, valideynlərin bu məsələ ilə bağlı həssaslığını anlayır və qeyd olunan iradları diqqətə alırıq. Gələcək mərhələlərdə bu kimi məqamların daha da təkmilləşdirilməsi üçün təşkilatçı qurum qarşısında müvafiq təkliflərin irəli sürülməsi nəzərdə tutulur", – deyə açıqlamada qeyd olunub.