"İnnovativ məktəb” layihəsi çərçivəsində keçirilən təlimlər yekunlaşıb

Azərbaycan Respublikasının Elm və Təhsil Nazirliyi ilə “ORT İsrail” məktəblər şəbəkəsinin əməkdaşlığı əsasında həyata keçirilən “İnnovativ məktəb” layihəsi çərçivəsində təlimlərin növbəti mərhələsi uğurla başa çatıb.

"Azərbaycan müəllimi" xəbər verir ki, 8-12 dekabr tarixlərində STEAM İnnovasiya Mərkəzində həyata keçirilən təlimlər zamanı ümumilikdə 11 məktəbi təmsil edən 45 nəfər pedaqoji heyət plenar iclas, məlumatın tədqiqatı, layihə və layihəəsaslı öyrənmə kimi bir sıra öyrənmə metodları barədə nəzəri və praktiki biliklər əldə edib və bu metodların dərs prosesində tətbiqi ilə bağlı müzakirələr aparıblar. Bundan başqa, müəllimlər problem əsaslı öyrənmə metodlarını mənimsədikdən sonra öz məktəblərindəki mövcud problemləri nəzərə alaraq təqdimatlar hazırlayayıb, təcrübələrini digər həmkarlar ilə bölüşüblər.

Qeyd edək ki, təlimlərdə iştirak edən məktəblər fəaliyyət planları hazırlayıblar və növbəti aylarda həyata keçirəcəkləri dəyişikliklər barədə hesabat təqdim edəcəklər.

Təlimin son günü bağlanış mərasimi keçirilib və iştirakçılara sertifikatlar təqdim olunub.