İlk dəfə bu orta məktəb akkreditasiyadan keçəcək - AÇIQLAMA

“İnnovativ məktəb – kompleks inkişaf modeli” layihəsi ilə Azərbaycanda ilk dəfə olaraq tam orta ümumtəhsil məktəbi akkreditasiyadan keçəcək”.

Bu fikirləri “Azərbaycan müəllimi”nə açıqlamasında Elm və Təhsil Nazirliyinin təhsildə inkişaf və innovasiyalar üzrə IX qrant müsabiqəsinin qalibi olan 56 nömrəli məktəbin direktoru Könül Hüseynova səsləndirib.

O bildirib ki, layihənin 9 qrant layihəsi arasında ən yüksək maliyyə dəstəyini qazanması sevindirici haldır:

“Bu bizim üçün həm böyük şərəf, həm də ciddi məsuliyyətdir. İnanırıq ki, “İnnovativ məktəb – kompleks inkişaf modeli” vasitəsilə Azərbaycan təhsilinə yeni yanaşma təqdim edəcəyik və layihənin funksional şəkildə uğurla işləyəcəyinə ümid edirik”.

Direktor qeyd edib ki, bu modelin digər məktəblər üçün də nümunə olacağına inanırlar. Layihənin ilk tətbiqi məhz 56 nömrəli məktəbdə həyata keçiriləcək:

“Layihə çərçivəsində pilot olaraq məktəb akreditasiyası tətbiq olunacaq. Akkreditasiya müəyyən meyarlar əsasında həyata keçiriləcək və bu meyarlar məktəbin, pedaqoji heyətin və ümumilikdə təhsil prosesinin səviyyəsini yüksəldəcək. Məqsəd dördillik fəaliyyətin nəticələrinə əsaslanaraq məktəbin inkişaf dinamikasını izləmək, aparılan təhlillər əsasında daha böyük uğurlara imza atmaqdır. Bu yanaşma məktəbi həm region, həm də Bakı səviyyəsində öncül təhsil müəssisələrindən birinə çevirmək və alternativ inkişaf modeli təqdim etmək baxımından mühüm əhəmiyyət daşıyır”.

Könül Hüseynova əlavə edib ki, layihə şagirdlərə də birbaşa təsir göstərəcək. Peşəkar təhsil mərkəzləri tərəfindən həyata keçiriləcək təlim və mentorluq fəaliyyətləri çərçivəsində uzunmüddətli dərs dinləmələri, təhlillər və inkişaf proqramları təşkil olunacaq. Şagirdlər artıq könüllü şəkildə bu təlimlərdə iştirak edir, onların dərs və sinifdaxili fəaliyyətləri mütəmadi olaraq monitorinq olunur:

“Layihənin əsas hədəflərindən biri də inkluzivliyin təmin edilməsidir. Məktəbdə inkluziv mərkəz yaradılır və dövlət hesabına xüsusi qayğıya ehtiyacı olan şagirdlərə dəstək göstəriləcək. Əməkdaşlıq çərçivəsində  Birgə və Sağlam İctimai Birliyinin rəhbəri Aykən Eynalov tərəfindən müvafiq fəaliyyətlər həyata keçiriləcək. Nəticədə məktəbdə inkluziv təhsil və ümumi inkişaf paralel şəkildə təmin olunacaq”.

O qeyd edib ki, layihə 10 ay müddətində, tədris ilini əhatə edən mərhələlər üzrə icra ediləcək. Bu dövrdə pedaqoji heyətin hazırlığı təmin olunacaq, inkluzivlik sahəsində ilkin addımlar atılacaq:

“Ümid edirik ki, pilot layihə uğurla yekunlaşacaq və gələcəkdə digər məktəblər üçün də tətbiq edilə bilən modelə çevriləcək”.