ADNSU ilə Gebze Texniki Universiteti arasında əməkdaşlıq imkanları müzakirə edilib

Azərbaycan Dövlət Neft və Sənaye Universitetinin (ADNSU) Startap və texnologiya transferi (TTO) şöbəsinin müdiri Əhməd Əhmədzadə Türkiyənin Gebze Texniki Universitetinə (GTÜ) işgüzar səfər edib. Səfər ADNSU ilə GTÜ arasında imzalanmış Strateji Əməkdaşlıq Memorandumunun icrası çərçivəsində həyata keçirilib.

"Azərbaycan müəllimi" xəbər verir ki, səfər zamanı Əhməd Əhmədzadə GTÜ-nün prorektoru Prof. Dr. Elif Damla Arısan və Beynəlxalq əlaqələr ofisinin koordinatoru Ceren Sarısaltık ilə görüşərək memorandumda nəzərdə tutulan əməkdaşlıq istiqamətlərinin praktik icrasını müzakirə edib. Görüşlər çərçivəsində universitetlərarası akademik və innovasiya yönümlü əməkdaşlığın genişləndirilməsi məsələlərinə toxunulub.

Eyni zamanda GTÜ Teknoparkının baş direktor müavini Ayşe Arasan ilə universitet–sənaye əməkdaşlığı, eləcə də mümkün birgə startap və inkubasiya proqramlarının reallaşdırılması imkanları ətrafında fikir mübadiləsi aparılıb. Səfər çərçivəsində AR-GE serası və Biotexnologiya İnstitutunda dərin texnologiyalar üzrə mövcud tədqiqat infrastrukturu ilə də tanışlıq olub.

Səfərin sonunda GTÜ Texnologiya transfer ofisinin baş direktoru Öndər Başkaya ilə keçirilən görüşdə TTO-lar arasında əməkdaşlığın gücləndirilməsi, texnologiyaların kommersiyalaşdırılması və birgə innovasiya təşəbbüslərinin həyata keçirilməsi müzakirə edilib. Bu əməkdaşlıq çərçivəsində ADNSU və Gebze Texniki Universiteti arasında startap və texnologiya transferi sahəsində birgə proqramların icrası nəzərdə tutulur.

Qeyd edək ki, səfər ADNSU ilə Gebze Texniki Universiteti arasında formalaşan strateji tərəfdaşlığın dərinləşdirilməsinə, eləcə də startap ekosistemi, innovasiya və texnologiya transferi sahələrində real birgə layihələrin reallaşdırılmasına mühüm töhfə verəcək.