Firudin Qurbanov: Məktəblərdə milli-mənəvi dəyərləri də formalaşdırmalıyıq

"Təhsil prosesində şagirdlərdə bilik, bacarıq və vərdişlərlə yanaşı, milli-mənəvi dəyərləri də formalaşdırmalıyıq".

“Azərbaycan müəllimi” xəbər verir ki, bunu elm və təhsil nazirinin müavini Firudin Qurbanov “Dini düşüncə mədəniyyəti: pedaqoji perspektivlər” mövzusunda keçirilən konfransda çıxışı zamanı bildirib.

O bildirib ki, gənclərdə milli-mənəvi dəyərlərin formalaşması çox önəmlidir: “Xalqın formalaşması uşaqların formalaşmasından asılıdır. Burada təhsilin rolu çox önəmlidir”.

Nazir müavini əlavə edib ki, bəzən sosial şəbəkələrdə dinlə bağlı yayılan məlumatlar radikallığa və ekstremizmə gətirə bilər:

"Son dövrlərdə sosial şəbəkələrdə dinlə bağlı çox məlumatlar yayılır. Bir tərəfdən bu məlumatlar insanları maarifləndirirsə, bəzən də radikallığa və ektremizmə gətirir. Belə halda təhsil öz rolunu oynayır. Təhsilin əsas məqsədlərindən biri məhz mənəvi-əxlaqi dəyərlərin gənc nəslə aşılanması olmalıdır. Bu, pedaqoji yanaşmalar baxımından son dərəcə vacib məsələdir. Təhsil perspektivlərində mənəvi və əxlaqi dəyərlərə xüsusi həssaslıqla yanaşılmalıdır. Çünki biz gələcəyimizi milli-mənəvi dəyərlərə söykənən gənclər üzərində qurmalıyıq".