Gürcüstanda ali təhsilin müddəti azaldılır

Gürcüstan Parlamenti ali təhsil sahəsində yeni islahat paketini birinci oxunuşda təsdiqləyib.

"Azərbaycan müəllimi" Gürcüstan mediasına istinadən xəbər verir ki, "Ali təhsil haqqında" Qanun layihəsi dövlət maliyyələşdirməsi qaydalarında dəyişiklikləri və dövlət universitetlərində dərəcə proqramlarının yenidən strukturlaşdırılmasını nəzərdə tutur.

Dəyişikliklərə əsasən, Gürcüstan hökuməti tərəfindən təsis olunan ali təhsil müəssisələrində təhsil tam şəkildə dövlət tərəfindən maliyyələşdiriləcək. Bundan əlavə, ali təhsil sistemi 3+1+1 modelinə keçirilir: bakalavr təhsili üçün üç il, magistratura və doktorantura üçün isə hər biri bir il müəyyən edilir.

Sənəd həmçinin planlaşdırılan onlayn universitetin konsepsiyasının, modelinin və standartlarının hazırlanması müddətinin uzadılmasını nəzərdə tutur. Hökumət bu işi 1 yanvar 2028-ci ilədək yekunlaşdırmalıdır.

Qeyd edək ki, hazırda Gürcüstan universitetlərində bakalavr pilləsi üzrə təhsilin müddəti 4, magistr pilləsi üzrə isə 2 ildir.