ADNSU “Take Off İstanbul”da Azərbaycanı təmsil edib

Azərbaycan Dövlət Neft və Sənaye Universiteti (ADNSU) 10–11 dekabr tarixlərində İstanbul Fuar Mərkəzində keçirilən “Take Off İstanbul” beynəlxalq startap zirvəsində Azərbaycanı təmsil edən yeganə ali təhsil müəssisəsi olub.

Universitetdən "Azərbaycan müəllimi"nə bildirilib ki, tədbirdə ADNSU-nu Startap və TTO şöbəsinin müdiri Əhməd Əhmədzadə, İctimaiyyətlə əlaqələr və marketinq şöbəsinin müdiri Xülya Sabirli, eləcə də startap müəllifləri Nərmin Məmmədova, Selcan Manaflı və Nigar Feyzi təmsil ediblər. Universitet nümayəndələri zirvə çərçivəsində müxtəlif panel və görüşlərdə iştirak edərək ADNSU-nun innovasiya mühitini, tələbələrin texnoloji yaradıcılığını və universitetdə formalaşan startap ekosistemini beynəlxalq tərəfdaşlara təqdim ediblər.

ADNSU builki tədbirdə xüsusi stendlə çıxış edərək universitet tələbələrinin “HealWith”, “VECTA” və “UManage” adlı 3 startap layihəsini beynəlxalq auditoriyaya təqdim edib. Startaplar ziyarətçilərə, ekspertlərə və potensial investorlara tanıdılıb, layihələrin tətbiq sahələri, innovativ xüsusiyyətləri və inkişaf perspektivləri barədə ətraflı məlumat verilib.

“HealWith” startapı tələbə Nərmin Məmmədova tərəfindən təqdim olunub. Layihə süni intellekt vasitəsilə bitki xəstəliklərinin erkən aşkar edilməsini mümkün edən mobil tətbiqdir. Tətbiq istifadəçinin çəkdiyi şəkil əsasında xəstəliyi tanıyır, diaqnostika aparır və müvafiq müalicə planı təqdim edir, bununla da fermerlər və istixana sahibkarları üçün məhsul itkisini əhəmiyyətli dərəcədə azaldır.

Selcan Manaflının təqdim etdiyi “VECTA” startapı isə torpağın nəmlik və temperaturunu yüksək dəqiqliklə ölçən portativ cihazdır. O, aqrar sahədə suvarma proseslərinin optimallaşdırılmasını və torpaq vəziyyətinin real vaxt rejimində monitorinqini təmin edir. Layihə sənədlərində cihazın yüksək həssaslıq, rahat istifadə və sensor dəqiqliyi ilə fərqləndiyi vurğulanır.

Nigar Feyzinin hazırladığı “UManage” startapı isə təhsil müəssisələrində elektron idarəetmə sistemlərini vahid platformada birləşdirən innovativ həll kimi təqdim olunub. Elektron jurnal, qiymətləndirmə, tələbə idarəetməsi, hesabat modulları və digər funksiyaları özündə birləşdirən bu sistem istənilən cihazda rahat istifadə imkanı və çevik texniki dəstək xidməti ilə seçilir. Nigar Feyzi həmçinin startap səhnəsində rəsmi təqdimat edərək, “UManage” layihəsini beynəlxalq investorlar qarşısında nümayiş etdirmək imkanı da qazanıb.

Qeyd edək ki, Türkiyə Teknoloji Takımı Vakfı, Türkiyə Respublikası Sənaye və Texnologiya Nazirliyi və Prezidentliyin İnvestisiya Ofisinin dəstəyi ilə təşkil edilən zirvə qlobal girişim ekosisteminin inkişafına və startapların investorlarla birbaşa əlaqə qurmasına şərait yaradan ən böyük regional platformalardan biridir. Tədbir 10 dekabr tarixində başlayıb və 11 dekabr tarixində də davam edəcək.