BMU-da “Karyera Həftəsi 2025” başlayıb

Bakı Mühəndislik Universitetində (BMU) Müəssisələrlə əlaqələr və karyera mərkəzinin təşkilatçılığı ilə "Karyera Həftəsi 2025”ə start verilib.

Universitetdən "Azərbaycan müəllimi"nə bildirilib ki, həftə çərçivəsində BMU-nun mühəndislik, memarlıq və inşaat fakültələrinin tələbə və məzunları üçün Məzun paneli və karyera sərgisi təşkil olunub. Paneldə çıxış edən mərkəzin müdiri Gülçöhrə İbrahimova bildirib ki, "Karyera Həftəsi 2025: Gələcəyini kəşf et!” layihəsi BMT-nin Dayanıqlı İnkişaf Məqsədlərindən 9-cu istiqamətə - “Sənaye, innovasiya və infrastruktur” hədəfinə uyğun olaraq həyata keçirilir. Bu təşəbbüsün əsas məqsədi gənclərin bilik və bacarıqlarının artırılması, onları iş dünyası ilə daha sıx əlaqələndirmək və innovativ düşüncə tərzlərinin inkişafına dəstək verməkdir. Vurğulanıb ki, belə tədbirlər tələbə və məzunların əmək bazarına hazırlanmasında mühüm rol oynayır.

Sonra panelin spikerləri – BMU məzunları “Azərbaycan Dəmir Yolları” QSC-nin mühəndisi Nəzrin Babayeva, “SOCAR Downstream Management” MMC-nin statik avadanlıqlar üzrə aparıcı mühəndisi Cavid Mustafayev, “EVRASCON” ASC-də inşaat mühəndisi Qismət İbişov,  “PD&MS Group”da məzun proses mühəndisi Elgün Nəcəfzadə öz peşəkar fəaliyyətləri barədə ətraflı məlumat veriblər. Onlar iş həyatına daxil olarkən qarşılaşdıqları təcrübələri, əldə etdikləri biliklərin real layihələrdə tətbiqi və karyera yüksəlişinin əsas mərhələlərini tələbələrlə bölüşüblər. Natiqlər, xüsusilə ixtisasın dərindən mənimsənilməsinin, tələbəlik dövründə təcrübə proqramlarında fəal iştirakın, xarici dil və kommunikasiya bacarıqlarının inkişafının mühüm əhəmiyyət daşıdığını vurğulayıblar. Çıxışlar zamanı tələbələrin diqqət etməli olduğu vacib nüanslar nəzərə çatdırılıb və məzunlara bir sıra praktik tövsiyələr verilib.

Sonda iştirakçıların sualları cavablandırılıb.

Panelin ardından karyera sərgisinə baxış keçirilib. Sərgidə  nüfuzlu dövlət və özəl şirkətlər öz stendi ilə təmsil olunub. Sərgi ilə tanışlıq zamanı tələbə və məzunlara vakansiyalar, təcrübə proqramları təqdim edilib. Sərginin gedişində tələbə və məzunlar şirkətlərlə ünsiyyət qurub, uyğun vakansiyalara CV-lərini vermək imkanı əldə ediblər.

Qeyd edək ki, “Holberton School Azerbaijan”, “Mama’m Bakery” və “Berqa”nın dəstəyi ilə keçirilən “Karyera Həftəsi 2025” çərçivəsində dekabrın 11-də İqtisadiyyat və idarəetmə, dekabrın 16-da isə İnformasiya və kompüter texnologiyaları fakültələrinin tələbələri üçün də məzun paneli, həmçinin karyera sərgisi təşkil olunacaq.