Nazir müşaviri - Metodbirləşmə rəhbərlərinin əksəriyyəti işi formal icra edib 

“Ölkənin uzun illər fəaliyyət göstərən metodik kabinetləri məktəblərə effektiv metodik dəstək göstərməkdə çətinliklərlə üzləşirdi”.

“Azərbaycan müəllimi” xəbər verir ki, bu fikirləri Təhsil İnstitutunun direktoru səlahiyyətlərini müvəqqəti icra edən, elm və təhsil nazirinin müşaviri Elnur Əliyev bu gün keçirilən “Ümumi təhsildə keyfiyyətin yüksəldilməsi: Təcrübələr və yeni yanaşmalar” adlı elmi-praktiki beynəlxalq konfransda məruzə ilə çıxış edərkən səsləndirib.

Onun sözlərinə görə, aparılan araşdırmalar 2022-ci ildə bir daha göstərdi ki, mövcud struktur üzərində müasir metodik xidmət qurmaq mümkün deyil və yeni modelin yaradılmasına ciddi ehtiyac var.

Elnur Əliyev bildirib ki, məktəblərdə ictimai əsaslarla fəaliyyət göstərən fənn metodbirləşmə rəhbərlərinin fəaliyyəti də araşdırılıb və monitorinqlər zamanı bu şəxslərin əksəriyyətinin işi formal şəkildə icra etdikləri müşahidə olunub. Onun sözlərinə görə, 30-a yaxın məktəbdə aparılan monitorinqlərdə fənn metodbirləşmə rəhbərləri bu işi adətən direktorun xahişi ilə üzərlərinə götürdüklərini qeyd ediblər.

Müşavir vurğulayıb ki, bütün bu nəticələr ölkədə metodik xidmətin yeni, müasir və daha səmərəli model üzrə qurulmasını zəruri edib.