ADNSU-da “Rəqəmsal dövrdə kommunikasiya və informasiya təhlükəsizliyi” mövzusunda təlim keçirilib

Azərbaycan Dövlət Neft və Sənaye Universitetində (ADNSU) “Natiqlik sənəti və kommunikasiya bacarıqları” layihəsi çərçivəsində növbəti təlim baş tutub.

Universitetdən "Azərbaycan müəllimi"nə bildirilib ki, budəfəki təlimin qonağı “Azerbaijan International Telecom” MMC-nin (AzInTelecom) Marketinq şöbəsinin rəhbəri Murad Əhmədov olub.

Təlim “Rəqəmsal dövrdə kommunikasiya və informasiya təhlükəsizliyi” mövzusuna həsr olunub. Murad Əhmədov çıxışı zamanı sürətlə inkişaf edən rəqəmsal kommunikasiya mühiti, məlumat təhlükəsizliyi çağırışları və texnologiyaların PR strategiyalarına təsiri barədə geniş məlumat verib. O, süni intellektin, bulud texnologiyalarının və sosial medianın kommunikasiya prosesində yaratdığı imkanlar və riskləri real nümunələr əsasında izah edib.

Təlimçi şirkətlərin rəqəmsal reputasiya idarəçiliyindən, açıq məlumat mühitində düzgün kommunikasiya aparma qaydalarından, brendlərin kibertəhlükəsizlik risklərinə qarşı necə hazırlıqlı olması gərəkdiyindən danışıb. İnternetdə yayılan məlumatların sürətlə çoxalması fonunda faktların yoxlanılması, mənbələrin etibarlılığının qiymətləndirilməsi və informasiya savadlılığının artırılması kimi mühüm prinsiplərin tələbələr tərəfindən mənimsənilməsi xüsusi vurğulanıb.

Sessiya interaktiv şəkildə davam edib. Sonda tələbələrin sualları cavablandırılıb.

Təlim boyu iştirakçılar rəqəmsal kommunikasiya alətlərindən düzgün istifadə, məlumat axınının idarə olunması, kibertəhlükəsizliklə bağlı anlayışların praktiki tətbiqi barədə dəyərli biliklər əldə ediblər.

Qeyd edək ki, “Natiqlik sənəti və kommunikasiya bacarıqları” layihəsi çərçivəsində ADNSU tələbələrinin media, texnologiya və kommunikasiya sahələrindən olan tanınmış mütəxəssislərlə görüşləri davam edir. Proqramın sonunda iştirakçılara sertifikatlar təqdim olunacaq və ən yüksək nəticə göstərən üç tələbə ADNSU Tələbə Həmkarlar İttifaqı Komitəsi tərəfindən xüsusi mükafatlandırılacaq.