79 yaşlı nənə hər gün dərsdə: İndi imtahana hazırlaşır 

Ordubad Peşə Liseyində “Xalçaçı” ixtisasında tələbələrə milli sərvətimiz olan xalçaçılıq sənətinin zəngin ənənələri öyrədilir.

“Azərbaycan müəllimi” xəbər verir ki, bu il Peşə Liseyinə qəbul olunaraq “Xalçaçı” ixtisasında oxuyan Ordubad sakini Hicrət Yusifova başqa tələbələr kimi, hər gün dərsə gəlib-gedir.  

Hicrət nənənin dərslərə o qədər marağı var ki, yanvar ayında olacaq imtahana da həvəslə hazırlaşır. O dərslərlə yanaşı, xalça toxumağı böyük istəklə öyrənir. Müəllimlər deyir ki, əslində istehsalat saatları az olsa da, dərs bitəndən sonra vaxt tapan kimi xalça toxumaq üçün istehsalat otağına gedir. Artıq tələbə yoldaşları ilə birlikdə bir neçə balaca xalça da toxuyub. Ondan yaşca cavan olan tələbələr isə müəllimləri ilə yanaşı, Hicrət nənədən də ilmə atmağı öyrənirlər. Görünür təkcə ilmə atmağı yox, eyni zamanda bilik qazanmaq eşqini də ondan öyrənirlər.

Noyabrın 19-u Hicrət Yusifovanın 79 yaşı tamam olub. Peşə məktəbində müəllim və tələbələrlə birlikdə yeni yaşını qeyd edib. Sevindirici hal budur ki, artıq nənə 79 yaşında, yəni 2026-c ilin yayında imtahan verərək diplom alacaq.

Qeyd edək ki, Hicrət Yusifova 1946-cı ildə Ordubad şəhərində anadan olub, onun 5 övladı, 12 nəvəsi və 12 nəticəsi var. O, 25 il Ordubad İpək Kombinatında çalışıb.