Çilidə məktəblərdə mobil telefonların qadağası ilə bağlı pilot layihə tətbiq olunub

Çilidə məktəblərdə mobil telefonların qadağası ilə bağlı pilot layihə tətbiq olunub

Çilinin paytaxtı Santyaqoda yerləşən “Lo Barnechea Bicentenario” məktəbində mobil telefonların istifadəsini məhdudlaşdıran pilot proqram tətbiq olunub.

“Azərbaycan müəllimi” xəbər verir ki, proqramın məqsədi şagirdlərin sosial münasibətlərini gücləndirmək və smartfon asılılığının mənfi təsirlərini azaltmaqdır.

Proqrama əsasən, şagirdlər dərs gününün əvvəlində telefonlarını siqnal bloklayan xüsusi qutulara yerləşdirir, cihazları yalnız məktəb bitdikdən sonra yenidən aktivləşdirə bilirlər. Bu yanaşma uşaqlara telefonlarından tam imtina etmədən daha sağlam davranış vərdişi qazandırır.

Məktəbin direktoru bildirib ki, dərslər arasında fasilə zamanı indi daha çox canlanma müşahidə olunur, şagirdlər vaxtlarını idman, stolüstü oyunlar, kitabxana və musiqi məşğələləri ilə keçirirlər. Şagirdlərin özləri də proqramdan razı qalıblar. Onların sözlərinə görə, əvvəllər telefonla vaxt keçirirdilərsə, indi daha çox ünsiyyət qurur, oyun və idmanla məşğul olurlar.

Proqram Çilidə ilk dəfə tətbiq olunub və mərhələli şəkildə digər məktəblərə də yayılması nəzərdə tutulur. Yerli hakimiyyət və təhsil ekspertləri hesab edir ki, bu addım həm şagirdlərin psixoloji sağlamlığına, həm də dərs nailiyyətlərinə müsbət təsir göstərəcək.

Eyni zamanda, Çili Senatının təhsil komitəsi ölkə üzrə məktəblərdə mobil cihazların istifadəsini qadağan və tənzimləyən qanun layihəsini dəstəkləyib. Layihənin yaxın zamanda parlamentdə müzakirəyə çıxarılması gözlənilir.