Magistratura təhsilinə doktorantura səviyyəsində olduğu kimi daha sərt tələblər qoyulmalıdır - Deputat

Magistratura təhsilinə doktorantura səviyyəsində olduğu kimi daha sərt tələblər qoyulmalıdır - Deputat

Magistratura təhsilinə doktorantura səviyyəsində olduğu kimi daha sərt tələblər qoyulmalıdır.

“Azərbaycan müəllimi” xəbər verir ki, bunu Milli Məclisin Elm və təhsil komitəsinin iclasında millət vəkili Vasif Qafarov çıxışında magistr pilləsinin təhsil sistemində əsas istiqamət kimi götürülməsinin vacibliyini qeyd edib. Onun sözlərinə görə, magistr dərəcəsi ölkənin intellektual potensialının gücləndirilməsinə xidmət etməli, tələbələrin əldə etdikləri bilik və bacarıqlar real elmi dəyər kəsb etməlidir.

Deputat bildirib ki, hazırda çoxlu sayda magistr işi yazılır, lakin onların əksəriyyəti elmə ciddi yenilik gətirmir və istinad olunmur:

“Bu gün yazılan işlərin böyük qismi yalnız formal xarakter daşıyır. Halbuki magistr pilləsi elmi araşdırmalara real töhfə verməli, yeni ideyaların formalaşmasına xidmət etməlidir”.

Vasif Qafarov əlavə edib ki, magistr təhsilinə də doktorantura səviyyəsində olduğu kimi daha sərt tələblər qoyulmalıdır. Onun fikrincə, bu addım həm təhsilin keyfiyyətini yüksəldəcək, həm də magistr işlərinin elmi nüfuzunu artıracaq.