Fransa yeni tədris ilində müəllim çatışmazlığı ilə üzləşib

Fransa yeni tədris ilində müəllim çatışmazlığı ilə üzləşib

Fransada 2025/2026-cı tədris ili sentyabrın 1-də müəllim çatışmazlığı və təhsil büdcəsinə dair mübahisələr fonunda başlayıb.

“Azərbaycan müəllimi” xəbər verir ki, Fransanın milli təhsil naziri Elizabet Born 2500 müəllim çatışmazlığı olduğunu açıqlayıb. Fransa Orta Məktəb Müəllimləri İttifaqının (SNES-FSU) məlumatına görə, 2018-ci ildən bəri şagirdlərin sayı artsa da, 8865 müəllim yeri ixtisar olunub.

2025-ci ilin büdcəsində təhsil xərclərinə əlavə 1,95 milyard avro nəzərdə tutulur, lakin ittifaq bildirir ki, inflyasiya fonunda real artım cəmi 0,48% təşkil edir.

SNES-FSU əməkhaqlarının aşağı olması səbəbindən bu peşənin cazibəsini itirdiyini deyir və 15%-lik maaş artımı tələb edirlər. 

Təhsil müəssisələrinin fiziki şəraiti də narahatlıq doğurur: bir çox məktəblərdə dərs otaqları qışda soyuq, yayda isə 40 dərəcəyə qədər isti olur. Nazirlik “istilik planı” hazırlasa da, həmkarlar ittifaqları bunun kifayət etmədiyini bildirirlər.

Peşə liseylərindəki islahatlar isə şagirdlərin maraqlarını nəzərə almadığı üçün əlavə narazılıq doğurub.