ADPU-da “Mexanikada yeni trendlər” adlı elmi konfrans keçiriləcək

ADPU-da “Mexanikada yeni trendlər” adlı elmi konfrans keçiriləcək

Azərbaycan Dövlət Pedaqoji Universiteti (ADPU) və Nəzəri və Tətbiqi Mexanika Türk Milli Komitəsinin əsas təşkilatçılığı ilə  2-5 sentyabr 2025-ci il tarixlərində Pedaqoji Universitetdə “Mexanikada yeni trendlər” (New Trends in Mechanics) I Beynəlxalq elmi konfransı keçiriləcək.

Universitetdən “Azərbaycan müəllimi”nə bildirilib ki, konfransda ABŞ, Almaniya, Avstriya, Azərbaycan, İtaliya və Türkiyə universitetlərindən və elmi-tədqiqat institutlarından tanınmış mütəxəssislər iştirak edəcəklər.

Qeyd edək ki, 46 ildir fasiləsiz olaraq hər iki ildən bir müxtəlif universitetlərdə təşkil olunan Türkiyənin ən uzunmüddətli elmi tədbiri olan və 24-cü dəfə keçirilən Milli Mexanika Konqresi bu il ilk dəfə olaraq beynəlxalq konfrans formatında Azərbaycanda – ADPU-da keçirilir. Konfrans beynəlxalq miqyası ilə mexanika və mühəndislik sahəsində qlobal elmi əməkdaşlıqlara zəmin yaradacaq.

Beynəlxalq konfrans Nəzəri və Tətbiqi Mexanika Türk Milli Komitəsinin (TUMTMK) və ADPU-nun koordinasiyası ilə, İstanbul Texniki Universiteti, İstanbul Ticarət Universiteti, Bakı Dövlət Universiteti və Azərbaycan Memarlıq və İnşaat Universiteti də daxil olmaqla bir çox universitetin töhfəsi ilə təşkil olunur.

Konfransın açılışında Azərbaycan Respublikasının Elm və Təhsil Nazirliyinin nümayəndələri, müxtəlif universitetlərin rektorları və tanınmış alimlər çıxış edəcəklər.

Çoxsaylı paralel sessiyalarda müzakirələrin aparılacağı beynəlxalq konfransda qeyri-yerli (nonlocal) və tor (mesh-free) metodlar, axınlar mexanikası, quruluş mexanikası, bərk cisim mexanikası, tətbiqi riyaziyyat və material mexanikası kimi sahələrdə yüzlərlə məruzə təqdim ediləcək.

Beynəlxalq konfransın proqramı ilə keçiddən tanış olmaq mümkündür.