SAT imtahanı ilə ali məktəbə qəbul olanlar da təhsil krediti ala biləcəklər – YENİ QƏRAR

SAT imtahanı ilə ali məktəbə qəbul olanlar da təhsil krediti ala biləcəklər – YENİ QƏRAR

SAT (Sxolastik Qiymətləndirmə Testi- (Scholastic Aptitude/Assessment Test) imtahanının nəticələri ilə ali təhsil müəssisələrinə qəbul olanlar da təhsil tələbə krediti ala biləcək. Qərar Təhsil Tələbə Krediti Fondunun (TTKF) Himayəçilik Şurasında qəbul edilib. 

TTKF-nin ictimaiyyətlə əlaqələr üzrə mütəxəssisi Gülnar Zeynalova “Azərbaycan müəllimi”nə bildirib ki, ölkəmizdə ilk dəfə 2025-2026-cı tədris ilindən SAT imtahanının nəticələri ilə ali təhsil müəssisələrinə qəbul olmuş tələbələrə də təhsil krediti veriləcək: “Himayəçilik Şurasının avqust ayında keçirilmiş iclasında ali təhsil səviyyələrinə yeni qəbul olmuş tələblərə dair mühüm qərar qəbul edilib. Həmin qərara görə, SAT imtahanının nəticələri ilə ali təhsil müəssisələrinə qəbul olunmuş bu tələbələrə də birinci tədris ilinin ilk semestrində standart tələbə krediti almaq imkanı yaradılıb. SAT imtahanı üzrə minimal bal hədd 1200-dür”.

G.Zeynalova əlavə edib ki, qəbul edilən qərar tələbələrin təhsil imkanlarının genişləndirilməsi, sosial bərabərliyin təmin olunması və daha çox gəncin təhsilə cəlb olunması baxımından çox əhəmiyyətlidir.