ETİHİ-də Tələbə Həmkarlar İttifaqı Komitələrinin sədrləri ilə görüş keçirilib

ETİHİ-də Tələbə Həmkarlar İttifaqı Komitələrinin sədrləri ilə görüş keçirilib

Avqustun 14-də Elm və Təhsil İşçiləri Həmkarlar İttifaqı Respublika Komitəsinin (ETİHİ RK) sədri Araz Paşayevin ali təhsil, orta ixtisas və peşə təhsili müəssisələrinin Tələbə Həmkarlar İttifaqı Komitələrinin (THİK) və Həmkarlar İttifaqı Komitələrinin (HİK) sədrləri ilə görüşü keçirilib.

ETİHİ-dən “Azərbaycan müəllimi”nə bildirilib ki, görüşdə 2025–2026-cı tədris ilində I kursa qəbul olunan tələbələrin həmkarlar ittifaqı üzvlüyünə cəlb edilməsi və bu istiqamətdə qarşıda duran vəzifələr ətraflı müzakirə olunub.

Tədbiri giriş sözü ilə açan Elm və Təhsil İşçiləri Həmkarlar İttifaqı Respublika Komitəsinin sədri Araz Paşayev tələbələrin ittifaqa qoşulmasının onların sosial, təhsil və mədəni hüquqlarının müdafiəsində, həmçinin gələcək karyera imkanlarının genişləndirilməsində mühüm rol oynadığını vurğulayıb. O, gənc üzvlərə yaradılacaq şərait, sosial-iqtisadi dəstək, təhsil, mədəniyyət, incəsənət, bədii yaradıcılıq və idman sahəsində göstəriləcək diqqət və qayğı barədə ətraflı məlumat verib.

Respublika Komitəsinin sədr müavini Mirzə Cəfərzadə çıxışında iştirakçıları yeni qəbul edilən tələbələrin ittifaqa cəlb olunması ilə bağlı təlimatlar və sənəd nümunələri ilə tanış edib.

Tədbirdə Respublika Komitəsinin son bir il ərzində həyata keçirdiyi fəaliyyətlər və qarşıdakı layihələr barədə ətraflı məlumat verilib. Araz Paşayev komitə sədrlərinə daha aktiv, şəffaf və üzvlərə operativ xidmət göstərmələri ilə bağlı tövsiyələrini çatdırıb.

Görüş qarşılıqlı fikir mübadiləsi şəraitində keçib, iştirakçıların sualları cavablandırılıb.