Zəhmətin bəhrəsi: Qızıl nişanlı məzunlar danışırlar

Zəhmətin bəhrəsi: Qızıl nişanlı məzunlar danışırlar

Bu il şimal-qərb bölgəsi də istedadlı gəncləri ilə qürur duyur. Bu il Şəki-Zaqatala Regional Təhsil İdarəsinin tabeliyindəki ümumi təhsil müəssisələrinin 12 nəfər 11-ci sinif məzunu qızıl, 3 nəfər isə gümüş nişanla təltif edilib. "Azərbaycan müəllimi" bu gənclərin bir neçəsi ilə həmsöhbət olaraq uğur hekayələrini onların öz dillərindən dinləyib.

Beynəlxalq arenada robototexnika uğurları

Zaqatala şəhəri akademik Zərifə Əliyeva adına Texniki fənlər təmayüllü liseyi qızıl nişanla başa vuran Hacı Hacıyev deyir:

"2023-cü ildə Azərbaycanda keçirilən Dünya Robot Olimpiadasında komandamızla birinci yerə çıxdıq. Həmin ilin noyabrında Panamada keçirilən dünya turunda isə ikinci yer tutduq. Bu, həqiqətən də inanılmaz bir təcrübə idi! 2024-cü ildə isə “Sabahın alimləri” yarışmasında “Ekologiya və ətraf mühit” kateqoriyasında komanda yoldaşımla birlikdə birinci yer qazandıq və bu bizi ABŞ-nin Los-Anceles şəhərinə - növbəti tura apardı. Bütün bu uğurlu fəaliyyətimə görə 2023-cü ildə Gənclər Günündə Gənclər və İdman Nazirliyi tərəfindən təltif olunmaq böyük qürur verdi.

Başqalarına deyə biləcəyim tək şey budur ki, həmişə çalışmaq lazımdır. Nə qədər çox sahədən məlumatlı olsaq, o qədər yaxşıdır. İmkan düşdükcə müxtəlif müsabiqə və yarışlarda iştirak etmək vacibdir. Gələcəkdə kompüter sahəsində özümü inkişaf etdirməyi düşünürəm. Təhsilimi xaricdə davam etdirmək niyyətindəyəm".

Əziyyət və inamın bəhrəsi

Eyni liseyin qızıl nişanla bitirən digər şagird Nurlan Qurbanovdur. O deyir ki, 9-cu sinifdə Respublika Fənn Olimpiadasında (RFO) biologiya fənni üzrə üçüncü, 10-cu sinifdə isə ikinci yeri tutub. IV qrup üzrə qəbul imtahanı verən Nurlan Azərbaycan Tibb Universitetində oxumaq istəyir: “Həmişə deyirəm ki, uğur əziyyətlə qazanılır. Əziyyət, inam və dəstək ilə istəklərin çoxuna çatmaq mümkündür.
Bu uğurda müəllim və valideynlərimin zəhməti mənimkindən daha çoxdur. Onlara, xüsusilə biologiya müəllimim Gülnar İbrahimovaya və ibtidai sinifdən hər zaman dəstək verən Naira İmanovaya minnətdaram".

Uğurlu şagirdin həkimlik arzusu

Sözügedən liseyin digər qızıl nişanlı məzunu Banu Musayeva öz hekayəsini belə danışır:

"2014-cü ildə Zaqatala rayon akademik Zərifə Əliyeva adına Texniki fənlər təmayüllü liseyə qəbul oldum. İlk müəllimim anam olub. Məktəb illərində olimpiada və inşa müsabiqələrində fəal iştirak etmişəm. 2022-ci ildə “Əziz Şuşa, sən azadsan” adlı inşa müsabiqəsində üçüncü yerin qalibi oldum. Məktəbi əla qiymətlərlə bitirdim.

Arzum Azərbaycan Tibb Universitetində təhsil almaq və gələcəyin savadlı həkimi olmaqdır. Üzərimdə əməyi olan ibtidai sinif müəllimim - anam Sevinc Loğmanovaya və digər müəllimlərimə minnətdarlığımı bildirirəm. Gənc dostlarıma tövsiyəm odur ki, olimpiada, müsabiqələrdə iştirak etsinlər, dərslərinə səylə çalışsınlar, ruhdan düşməsinlər".

Robototexnikadan beynəlxalq zəfərlərə

Zaqatala şəhər Əliabad qəsəbə 4 nömrəli tam orta məktəbin şagirdi Əlibali Əlibəyov da sevincini belə dilə gətirir:

"Robototexnikaya marağım uşaqlıqdan başlayıb, oyuncaqları söküb yığmaq və nələrisə düzəltməyə çalışmaq mənə əyləncəli gəlirdi. 7-ci sinifdə müəllimlərimin yönləndirməsi ilə Azərbaycan Robotexnologiya və Mühəndislik Akademiyasında robototexnika təhsilinə başladım. Sadə bir maraq zamanla inkişaf edərək beynəlxalq arenada uğurlara çevrildi.

Bu müddətdə ölkəmizi beynəlxalq arenada təmsil etmək qürurverici olub.

Ümid edirəm ki, bu yoldakı uğurlarıma qətiyyətlə davam edəcəyəm. Məktəb dərslərinə də daim əhəmiyyət vermiş, valideyn və müəllimlərin etimadını doğrultmağa çalışmışam. Böyük məmnuniyyətlə deyə bilərəm ki, buraxılış və qəbul imtahanlarından ümumilikdə 646 bal toplamışam. 

Gələcəklə bağlı xəyallarıma gəlincə, xaricdə texnologiya sahəsində daha irəlidə olan ölkələrdə təhsil alıb oradakı yenilikləri mənimsəmək istəyirəm. Məqsədim isə bu bilikləri ölkəmizə gətirib bizdən sonra gələnlərlə bölüşməkdir. Ümid edirəm ki, bir gün biz də bu sahədə dünyanın qabaqcıl ölkələrindən biri olacağıq. Mədəniyyət və gözəllik beşiyi olan Azərbaycanımız həm də texnologiya beşiyinə çevriləcək".

Biologiyaya olan sevgi və xaricdə təhsil arzusu

Şəki şəhər 11 nömrəli tam orta məktəbin məzunu Sultan Paşazadə bildirir ki, biologiya fənninə qarşı böyük sevgisi olduğu üçün özünü mikrobiologiya üzrə inkişaf etdirmək istəyir: “Araşdırmaçı olmaq və təhsilimi xaricdə davam etdirmək arzum var. Bakı Dövlət Universitetində oxumaq və daha sonra İsveçdə təhsilimə davam etmək niyyətindəyəm. Məktəbdə də tərbiyəli və əlaçı şagird olmuşam, bütün müəllimlər tərəfindən sevilmişəm. Biologiya müəllimim Elşad Abbasov və sinif rəhbərim Mehriban Hacıyeva mənim təhsilimdə və şəxsi inkişafımda çox böyük dəstək olublar. Məqsədə çatmaq üçün iradəli olmaq, özünə güvənmək lazımdır”.