“WorldSkills Azerbaijan” qaynaqçılıq üzrə yarışın qalibləri müəyyənləşib

“WorldSkills Azerbaijan” qaynaqçılıq üzrə yarışın qalibləri müəyyənləşib

3 iyul tarixində Sənaye və İnnovasiyalar üzrə Bakı Dövlət Peşə Təhsil Mərkəzinin “WorldSkills Azerbaijan” İctimai Birliyi ilə əməkdaşlığı çərçivəsində keçirilən qaynaqçılıq üzrə milli yarış uğurla başa çatıb.

“Azərbaycan müəllimi” xəbər verir ki, yarış 16–21 yaş aralığında olan gənclər arasında qaynaqçılıq üzrə texniki bilik və peşə bacarıqlarını yoxlamaq məqsədi daşıyıb. Ümumilikdə 29 iştirakçı yarışda öz gücünü sınayıb. Müsabiqə peşəkar mühitdə və beynəlxalq standartlara uyğun şəkildə təşkil olunub.

Yarış nəticələrinə əsasən, Cavid Gülməmmədov I yerə, Rəsul Babazadə II yerə, Fəqan qaraşlı III yerə layiq görülüb. Qalib iştirakçı peşəkar bacarıqlarını daha da inkişaf etdirmək məqsədilə Çində keçiriləcək xüsusi təlim proqramında iştirak edəcək. Qalib şəxsin adı 2026-cı ildə Çində keçiriləcək və 85-dən çox ölkənin qatılacağı “WorldSkills Shanghai” yarışında iştirak üçün potensial namizədlər siyahısına daxil ediləcək.

Dünyada müxtəlif bacarıq istiqamətləri üzrə olimpiadaların təşkilatçısı kimi tanınan “WorldSkills” hərəkatı iştirakçıların peşə bacarıqlarını nümayiş etdirmələrinə imkan yaradan yarış formatıdır və bununla yanaşı, qlobal standartların və əmək bazarının tələblərinin təhsil sisteminə inteqrasiyasını təşviq edir.