Tələbə krediti üçün il sonunadək ayrılan vəsaitin həcmi açıqlandı

Tələbə krediti üçün il sonunadək ayrılan vəsaitin həcmi açıqlandı

Tələbə krediti üçün ayrılan vəsaitin həcminin 2025-ci ilin sonunadək 22 milyon manata çatacağı gözlənilir.

“Azərbaycan müəllimi” xəbər verir ki, bu barədə Trend-in sorğusuna cavab olaraq Təhsil Tələbə Krediti Fondundan məlumat verilib.

Bildirilib ki, Fondun maliyyələşdirdiyi tələbələrin sayı ildən-ilə artan dinamika ilə dəyişir:

"Bu artım, ölkənin təhsil strategiyasının mühüm göstəricilərindən biri olmaqla yanaşı, tələbələrə göstərilən dəstəyin gücləndirilməsi baxımından da xüsusi əhəmiyyət daşıyır. Belə ki, 2021/2022-ci tədris ili üçün 6 milyon manat ayrıldığı halda, bu məbləğ 2022/2023-cü tədris ilində 11.8 milyon manata, 2023/2024-cü tədris ilində isə 16 milyon manata çatıb. 2024/2025-ci tədris ili üçün isə ayrılan maliyyə vəsaiti 19.6 milyon manat təşkil edir".

Fonddan qeyd edilib ki, təqvim illəri üzrə də ardıcıl artım müşahidə olunur.

"2022-ci ildə 10.2 milyon manat, 2023-cü ildə 13.9 milyon manat, 2024-cü ildə isə 17.5 milyon manat vəsait ayrılıb. 2025-ci ilin ilk altı ayı ərzində bu məbləğ artıq 11.7 milyon manata çatıb. Mövcud proqnozlara əsasən, 2025-ci ilin sonunadək bu rəqəmin 22 milyon manata çatacağı gözlənilir.

Ümumilikdə Fond yarandığı gündən bu günədək tələbələrə 53 milyon manatdan çox maliyyə dəstəyi göstərib. Bu vəsaitin 33 milyon manatdan çoxu standart növ təhsil tələbə krediti, 20 milyon manatdan çoxu isə sosial növ təhsil tələbə krediti üzrə ayrılıb. Bu nisbət, Fondun həm sosial bərabərliyini təmin etməyə, həm də təhsil imkanlarını genişləndirməyə yönəlmiş fəaliyyətini əks etdirir", - deyə qurumdan əlavə edilib.

Qeyd edək ki, Təhsil Tələbə Krediti Fondu 2021-ci ildən etibarən ölkədə təhsil alan Azərbaycan Respublikası vətəndaşı olan tələbələrin maddi yükünü azaltmaq məqsədilə fəaliyyət göstərir. Hazırda Fond tərəfindən təqdim olunan sosial və standart növ təhsil tələbə kreditləri minlərlə tələbənin təhsilini davam etdirməsinə şərait yaradır.