Millətlərarası dostluq evinin sədri Mərkəzi Elmi Kitabxanada olub

Millətlərarası dostluq evinin sədri Mərkəzi Elmi Kitabxanada olub

Rusiya Federasiyasının Novosibirsk şəhərində fəaliyyət göstərən Millətlərarası dostluq evinin sədri Nizami Mirzəyev Azərbaycan Milli Elmlər Akademiyasının Mərkəzi Elmi Kitabxanasında (MEK) olub, direktor texnika elmləri doktoru Hüseyn Hüseynovla görüşüb.

Görüş zamanı tərəflər gələcək əməkdaşlıq istiqamətləri üzrə fikir mübadiləsi aparıblar. Xüsusilə, Novosibirsk şəhərində yaradılması nəzərdə tutulan yeni elmi cəmiyyətin - "Sibir–Azərbaycan" Mədəni Əlaqələrin İnkişafı və Təhsil Təşəbbüslərinin Dəstəyi üzrə Mərkəzin fəaliyyəti geniş şəkildə müzakirə olunub.

Həmçinin qeyd olunub ki, bu cəmiyyətin təşəbbüsü və dəstəyi ilə Novosibirsk şəhərindəki Rusiya Elmlər Akademiyası Sibir bölməsinin Dövlət Elmi-Texniki Kitabxanasında Azərbaycan ədəbiyyatı guşəsi yaradılacaq. Guşədə Azərbaycanın tarixi, mədəniyyəti və elmi irsini əks etdirən kitablar, materiallar və multimedia resursları toplanacaq.

Görüşdə vurğulanıb ki, həm elmi mərkəzin, həm də Azərbaycan guşəsinin açılış mərasimində MEK direktorunun da iştirakı nəzərdə tutulur.

Görüşün sonunda qonaq Mərkəzi Elmi Kitabxananın zəngin fondu, rəqəmsallaşdırma imkanlarını və oxucular üçün yaradılmış müasir şəraiti ilə yaxından tanış olub.