MEK əməkdaşlarının ezamiyyətlərinə dair hesabatları dinlənilib

MEK əməkdaşlarının ezamiyyətlərinə dair hesabatları dinlənilib

AMEA Rəyasət Heyətinin müvafiq qərarına əsasən, Mərkəzi Elmi Kitabxananın (MEK) ezamiyyətdən qayıdan əməkdaşlarının hesabatları dinlənilib.

Cari ildə MEK-in bir sıra əməkdaşları müxtəlif ölkələrdə və regionlarda keçirilən elmi tədbirlərdə və beynəlxalq konfranslarda iştirak ediblər.

Aprel ayının əvvəlində AMEA Mərkəzi Elmi Kitabxanasının direktoru, texnika elmləri doktoru Hüseyn Hüseynov və Sənədlərlə iş şöbəsinin baş mütəxəssisi Azad Qurbanov Beynəlxalq Kitabxana və Texnologiya Festivalında iştirak məqsədilə Türkiyəyə səfər ediblər. A. Qurbanov səfər çərçivəsində kitabxanalarda süni intellekt və müasir informasiya texnologiyalarının tətbiqi ilə bağlı keçirilən bir sıra görüşlər barədə məlumat verib, bu sahədə əldə olunan ilkin razılaşmaların MEK-də də tətbiqi üçün imkanlar yaratdığını vurğulayıb.

Çıxışının sonunda o, səfərin nəticəsi olaraq kitabxana sahəsində əməkdaşlığın inkişaf etdirilməsi baxımından mühüm əhəmiyyət daşıyan bir sənədin — MEK ilə Rami Kitabxanası arasında "Qardaş Kitabxanalar Anlaşma Memorandumu"nun da imzalandığını diqqətə çatdırıb.

Bundan əlavə, Rəqəmsallaşma, innovasiya və elektron xidmətlər üzrə direktor müavini, tarix üzrə fəlsəfə doktoru Oruc Quliyev Gəncədə “Müasir Kitabxana 5.0: Universitet Kitabxanalarının Yeni Missiyası” mövzusunda keçirilən beynəlxalq forumda çıxış edib. Elmi katib Şəbnəm Rüstəmova “Gəncədən başlayan dövlətçilik salnaməsi” mövzusuna həsr olunmuş respublika elmi konfransında iştirak məqsədilə Gəncə şəhərinə ezam olunub. Komplektləşdirmə şöbəsinin baş kitabxanaçısı Xədicə Ağayeva Rusiya Dövlət Kitabxanasında təşkil olunan "Rumyantsev oxuları – 2025" adlı beynəlxalq elmi-praktiki konfransda ölkəmizi təmsil edib. Elektron resurslar şöbəsinin baş mütəxəssisləri Xəyalə Məmmədli, Xəyalə Kərimova və Rövşən Məmmədli Digital Bilgi Dərnəyinin təşkilatçılığı ilə keçirilən “Türk vikipediyaçıları” tədbirinə qatılmaq üçün Türkiyəyə səfər ediblər. Azərbaycanşünaslıq və Milli Rəqəmsal Yaddaş şöbəsinin baş mütəxəssisləri Surə Məmmədova və Aytən Xudiyeva Karadeniz Teknik Universitetinin kitabxanasında həyata keçirilən yeniliklərlə tanış olmaq məqsədilə Türkiyəyə səfər ediblər. Elektron resurslar şöbəsinin baş mütəxəssisi Günay Nəciyeva və mütəxəssis Nuray Tanrıverdiyeva milli-mənəvi dəyərləri gənclərə mənimsətmək məqsədilə Qazax rayonunda təşkil olunan tədbirdə iştirak ediblər.

Hesabat zamanı həyata keçirilən beynəlxalq səfərlərin Kitabxananın fəaliyyəti və beynəlxalq əməkdaşlıq imkanlarının genişləndirilməsi baxımından əhəmiyyəti xüsusi vurğulanıb.

Sonda MEK direktoru Hüseyn Hüseynov çıxış edərək ezamiyyələrin əhəmiyyətinə toxunub, əməkdaşların əldə etdikləri bilik və təcrübəni kitabxana fəaliyyətinə inteqrasiya etmələrinin vacibliyini qeyd edərək tapşırıq və tövsiyyələrini verib.