Azərbaycanlı alimlərin məqaləsi nüfuzlu jurnalda dərc olunub

Azərbaycanlı alimlərin məqaləsi nüfuzlu jurnalda dərc olunub

AR ETN Molekulyar Biologiya və Biotexnologiyalar İnstitutunun əməkdaşlarının Azərbaycan Tibb Universitetinin alimləri ilə birgə apardıqları tədqiqatları əks etdirən məqalə nüfuzlu jurnalda dərc olunub.

“Azərbaycan müəllimi” xəbər verir ki, məqalə “Biochemistry (Moscow) Биохимия” (İmpakt faktor – 2.3)  jurnalında ingilis və rus dillərində dərc edilib.

Müəllifləri Nahidə Əliyeva, Durna Əliyeva, Səftər Süleymanov, Fuad Rzayev, Eldar Qasımov və İradə Hüseynova olan “Comparative Analysis of Mesophyll and Bundle Sheath Chloroplasts from Maize Plants Subjected to Salt Stress” başlıqlı məqalə bu ilin aprel nömrəsində (2025, Vol.90, No.4, pp.1-12) çap edilib. Məqalədə ilk dəfə olaraq fotosintezin C4-metabolizminə aid qarğıdalı bitkisinin (Zaqatala-420 sortu) mezofil və örtüktopa hüceyrələrinin tilakoid membranlarının biokimyəvi xüsusiyyətləri və ultrastrukturu normal şəraitdə (0 mM NaCl) və duz stresinin (100 mM, 200 mM və 250 mM) təsiri zamanı kompleks şəkildə müqayisəli öyrənilib. Göstərilmişdir ki, qarğıdalının mezofil və örtüktopa xloroplastları biokimyəvi parametrlərinə, ultrastrukturuna və duz stresinə tolerantlığına görə əhəmiyyətli dərəcədə fərqlənirlər. Müəyyən edilmişdir ki, mezofil hüceyrələri örtüktopa hüceyrələrinə nisbətən duz stresinə daha həssasdırlar.