Uşaqlar üçün unudulmaz gün: “İngilis dili” pikniki – REPORTAJ

Uşaqlar üçün unudulmaz gün: “İngilis dili” pikniki – REPORTAJ

Həftəsonunda “Gənclik” metrosunun yaxınlığında yerləşən Pişəvəri Parkı fərqli bir səbəblə uşaqların sevinc səsləri ilə dolmuşdu. Elm və Təhsil Nazirliyinin və “Kapital Bank”ın dəstəyi ilə həyata keçirilən “Oxut” layihəsi çərçivəsində şəhid və aztəminatlı ailələrin övladları üçün interaktiv və əyləncəli “İngilis dili” pikniki təşkil olunmuşdu. 

Məqsəd isə sadə olduğu qədər dəyərli idi. Belə ki, öyrənməni sevdirərək uşaqların ümidini gücləndirmək “Oxut” layihəsinin əsas hədəflərindəndir. 

Sıra ilə düzülmüş kiçik rəsm tabloları, rəngli markerlər, şəkilli kağızlar və təbii ki, bu işdə uşaqlara istiqamət verən, öyrətməyə təşviq edən təlimçilər, müəllimlər. İngilis dilini əzbərləməklə deyil, oyun və təcrübə ilə öyrənmək üçün yaradılmış bu tədris mühiti, əslində, uşaqlar üçün həm öyrədici, həm də psixoloji baxımdan motivasiyaedici bir atmosfer yaradır.

“Həyatlarına kiçik də olsa, müsbət toxunuş edə biliriksə, bu bizim üçün ən böyük uğurdur”

Layihənin əsas məqsədinin aztəminatlı ailələr, şəhid və qazi övladlarının təhsilə çıxışını təmin etmək və onlar üçün ingilis dili mühiti yaratmaq olduğunu söyləyən Ülkər Nasirli “Oxut” layihəsinin təşkilatçısıdır. O deyir ki, bu uşaqlara ingilis dilini əzbərlətməklə deyil, danışaraq, əylənərək öyrətmək istəyirlər: ““Oxut” layihəsində tədris prosesimiz qrammatik qaydalardan çox danışıq bacarıqlarının inkişafına yönəlib. Çünki ingilis dili beynəlxalq dildir və onu öyrənməyin ən effektiv yolu da aktiv ünsiyyətdir. Hədəfimiz uşaqları sıxmadan, maraqlı və rəngarəng fəaliyyətlər vasitəsilə bu dili mənimsəməyə təşviq etməkdir. Tədbirimizdə uşaqlar təxminən 2 saat boyunca müxtəlif oyun, yaradıcılıq məşğələləri və əyləncəli fəaliyyətlərlə məşğul olurlar. Tədris tamamilə ingilis dilində aparılır və uşaqlar bu müddətdə həm əylənir, həm də öyrənirlər. Vaxtın necə keçdiyini hiss etmir və tədbirdən sonra yenidən gəlmək istədiklərini bildirirlər. Hər tədbirə fərqli məzmun qatmağa çalışırıq. Buna görə də “Yeni il”, “Halloween”, “Novruz” tədbirləri və digər mövsümi tədbirlərlə prosesi daha maraqlı edirik”.

O qeyd edib ki, layihəyə 5- 15 yaşlı uşaqlar cəlb olunur: “Layihədən təxminən 1 ay əvvəl valideynlərlə əlaqə saxlayaraq hər uşağın dil səviyyəsini fərdi şəkildə yoxlayırıq. Bizim xüsusi qeydiyyat sistemimiz var və burada hər bir uşağın yaşı və dil səviyyəsi qeydə alınır. Tədbirdə iştirak üçün 60-a yaxın uşaq qeydiyyatdan keçirsə, onları yaş və səviyyəyə uyğun qruplara bölürük. Əgər uyğun qrup yoxdursa, uşağı onun üçün ən münasib olanına əlavə edirik. Dərslər tam olaraq dil səviyyəsinə uyğun şəkildə keçirilir. Hətta bəzən sıfırdan,  yəni hərflərdən belə başlayırıq. Bu uşaqlar  oktyabr ayından dərslərimizə qoşulublar və bu müddət ərzində nəzərəçarpacaq dərəcədə irəliləyiş əldə ediblər. Layihəmiz çərçivəsində 8 ay boyunca Elm və Təhsil Nazirliyi ilə əməkdaşlıq etmişik və artıq bir ili geridə qoymuşuq”.

Ülkər Nəsirli vurğulayıb ki, “Oxut” layihəsi uşaqların dünyagörüşünü genişləndirir: “Onlar yeni insanlar tanıyır, fərqli mühitlərdə özlərini ifadə etməyi öyrənirlər. Əgər bu layihə sayəsində onların həyatlarına kiçik də olsa, müsbət bir toxunuş edə biliriksə, bu bizim üçün ən böyük uğurdur. Müəllimlərimiz təkcə dərs keçən deyil, həm də psixoloji dəstək verən, uşaqları motivasiya edən şəxslərdir. Hər dərs təqdimat formatında keçirilir, təqdimatsız dərs olmur. Komandamızda yüksək pedaqoji bacarığa sahib, öyrətməyi sevən müəllimlər çalışır”.

Tədbir boyunca uşaqlar həm öyrəndilər, həm də doya-doya əyləndilər. Gün müxtəlif yaş qruplarına uyğunlaşdırılmış interaktiv fəaliyyətlərlə zəngin idi. İlk olaraq, uşaqlar tanışlıq oyunu vasitəsilə bir-birlərini ingilis dilində təqdim etməyə çalışdılar. “My name is…”, “I am… years old” kimi ifadələrlə başlayan bu tanışlıq həm gülüşlərlə dolu, həm də dil öyrənmə baxımından faydalı oldu.

Daha sonra yaradıcı fəaliyyətlərə start verildi. Uşaqlar rəngli kağız, marker və boyalarla öz rəsmlərini çəkdilər. Ən maraqlısı isə bu rəsmləri ingilis dilində təqdim etmələri idi. Məsələn, bir uşaq çəkdiyi ev şəklini göstərərək “This is my home. It has two windows and a big door”,- deməklə həm söz bazasını gücləndirdi, həm də təqdimat bacarığını inkişaf etdirdi. Eyni zamanda, fiziki hərəkətə əsaslanan oyunlar da uşaqların gününə rəng qatdı. “Find and say”, “Guess the object” kimi oyunlarda uşaqlar verilən tapşırıqları ingilis dilində yerinə yetirməyə çalışdılar.

“Burada rəsm çəkməyimiz məni çox sevindirdi”

Fatimə Həsənova Bakı şəhər 13 nömrəli məktəbin 3-cü sinif şagirdidir. O, sakit, amma maraq dolu baxışlarla ətrafı izləyir. Əllərindəki rəngli karandaşları göstərərək deyir: “Böyüyəndə rəssam olmaq istəyirəm. Burada rəsm çəkməyimiz məni çox sevindirdi”.

Sözlərinə bir qədər utancaq, amma ümidli tonla davam edir: “Əgər bu cür dərslər tez-tez olsa, həm rəsm çəkərik, həm də yeni şeylər öyrənərik. Mən ingilis dilini sevməyə başlamışam”.

“Bu dili öyrənmək gələcəkdə mənə çox lazım olacaq”

Sadiq Şahbazlı Bakı şəhər 28 nömrəli məktəbin 8-ci sinif şagirdidir. 

Tədbir zamanı üzündə təbəssüm, amma sözlərində ciddilik hiss olunurdu: “İngilis dili dərsləri mənim üçün çox maraqlı idi, çünki bu dili öyrənmək gələcəkdə mənə çox lazım olacaq. Mən maliyyə sahəsində oxumaq istəyirəm və bunun üçün ingilis dilini yaxşı bilməliyəm. Xarici universitetlərə qəbul olmaq üçün də bu dil vacibdir. Burada oyunla, interaktiv şəkildə öyrənmək daha maraqlı oldu. Dərs kimi hiss olunmadı, amma çox şey yadda qaldı”. 

“Gül və günəş şəkli çəkdim”

Aylin Mustafazadə 212 nömrəli məktəbin 1-ci sinif şagirdidir. Balaca əlləri ilə çəkdiyi rəsmi tutaraq deyir: “Məktəbdə 5 dostum var, amma burada Səma adlı bir dost tapdım. Biz bir yerdə rəsm çəkdik. Mən böyüyəndə rəssam olacağam. Bu gün burada çoxlu rəngli kağız və karandaşlar var idi. Mən gül və günəş şəkli çəkdim. Müəllim dedi ki, çox gözəldir. Sevindim”.

“Bu cür tədbirlər uşaqlarda dil öyrənməyə marağı artırır”

“Oxut” layihəsi çərçivəsində uşaqlara çox həvəslə dərs keçən uşaq istiqaməti üzrə baş müəllim Nigar İsayeva deyir ki, əsas məqsəd uşaqlara ingilis dilini təbii və sevdirici bir yolla  öyrətməkdir: “İnanırıq ki, dil yalnız dərs mühitində deyil, uşaqların maraqla iştirak etdiyi sosial və əyləncəli tədbirlərdə daha effektiv şəkildə mənimsənilir. Buna görə də “Oxut” layihəsi çərçivəsində uşaqların sevdiyi məşğuliyyətlər əsasında tədbirlər təşkil edirik. Bunlara oyun əsaslı dərslər, rəsm məşğələləri, pizza hazırlama master-klassları və digər kreativ fəaliyyətlər daxildir. Bu gün təşkil etdiyimiz piknik də bu tədbirlərin bir hissəsidir. İlin müxtəlif dövrlərində 3-4 dəfə bu cür görüşlər təşkil etməyə çalışırıq. Bu cür tədbirlər uşaqlarda dil öyrənməyə marağı artırır və ehtiyac hissini gücləndirir”.

Layihənin əvvəlində uşaqların dil bacarıqlarının zəif olduğunu və adaptasiya prosesinin çətin getdiyini deyən Nigar İsayeva zamanla onların ingilis dili səviyyəsinin yüksəldiyini, artıq oyunlarda daha fəal iştirak etdiklərini dilə gətirib: “Çalışırıq ki, bütün fəaliyyətlər uşaqların yaş və dil səviyyəsinə uyğun olsun. Müxtəlif yaş qruplarını ayıraraq hər birinə uyğun oyunlar, suallar və məşğələlər təqdim edirik. Məsələn, piknik zamanı yeniyetmə və kiçikyaşlı uşaqları ayrı-ayrı bölmələrə ayırdıq, onlarla fərqli müəllimlər işləyir. Təəssüf ki, bölgələrdə yaşayan bəzi layihə iştirakçılarımız bu tədbirlərə qatıla bilmirlər. Amma Bakı və ətraf ərazilərdə yaşayan uşaqlar tədbirlərimizdə aktiv şəkildə iştirak edirlər”.

Tədbirin sonunda isə uşaqlar üçün kiçik, amma dəyərli  sürpriz oldu. Hər bir iştirakçıya xüsusi hazırlanmış sertifikatlar təqdim olundu. Bu, uşaqlara yalnız bir günün deyil, həm də onların çalışqanlığının və öyrənmək istəyinin təqdir olunduğunu göstərdi.