Xankəndidə daha bir məktəb açılacaq

Xankəndidə daha bir məktəb açılacaq 

“İşğaldan azad edilmiş ərazilərdə həm şagird sayımız, həm də təhsil müəssisələrinin sayı getdikcə artır. Hazırda 20 təhsil müəssisəsi, yəni məktəb və bağça fəaliyyət göstərir və ümumi şagird sayı 2200-ə çatır. Orada təxminən 200-ə yaxın azyaşlı bağçalara gedir”. 

“Azərbaycan müəllimi” xəbər verir ki, bu fikirləri “Ən yaxşı təqdimat” müsabiqəsinin qaliblərinin mükafatlandırılması mərasimində elm və təhsil naziri Emin Əmrullayev səsləndirib.

O bildirib ki, növbəti ildə bu sayın dəfələrlə artacağı gözlənilir. Artıq bir çox kənd və şəhərlərdə yeni tədris müəssisələrinin tikintisi ya başa çatıb, ya da davam edir:

“İnanıram ki, 2026-cı ilə qədər biz bir çox yeni təhsil müəssisələrinin fəaliyyətə başladığını görəcəyik. Xankəndi şəhərindəki 4 nömrəli məktəb tam gücü ilə fəaliyyət göstərir. Həmin ərazidə ikinci məktəbin də açılması planlaşdırılır. Bu baxımdan əminliklə deyə bilərik ki, yaxın illərdə işğaldan azad edilmiş bütün ərazilərimizdə təhsilin bərpası və inkişafı istiqamətində böyük irəliləyişlər olacaq”.