IV və VI siniflərində monitorinq elektron qaydada keçiriləcək

IV və VI siniflərində monitorinq elektron qaydada keçiriləcək

Mayın 17-18-də ölkə üzrə bütün dövlət ümumi təhsil müəssisələrinin IV və VI siniflərində monitorinq qiymətləndirilməsi həyata keçiriləcək. Bu ildən etibarən monitorinq prosesində rəqəmsal mərhələyə keçid baş tutur.

Məktəbəqədər və Ümumi Təhsil üzrə Dövlət Agentliyindən “Azərbaycan müəllimi”nə verilən məlumata görə, qiymətləndirmənin müəyyən hissəsinin kompüter əsaslı formatda təşkili planlaşdırılır.

Artıq bu istiqamətdə ilk addımlar atılıb. Aprelin 12-13-də monitorinqin sınaq mərhələsi ilk dəfə kompüter əsaslı formatda təşkil olunub və uğurla başa çatıb. Sınaq prosesinə hər sinif üzrə 900-ə yaxın şagird cəlb edilib.

Cari ildə Bakı Şəhəri üzrə Təhsil İdarəsi və Abşeron-Xızı Regional Təhsil İdarələrinin tabeliyində fəaliyyət göstərən bir sıra ümumi təhsil müəssisələrində 10 000-dək şagirdin kompüter əsaslı monitorinq qiymətləndirməsində iştirakı nəzərdə tutulur.

Qeyd edək ki, monitorinq prosesində rəqəmsallaşmanın tətbiqi ilə əsas məqsəd təhsildə qiymətləndirmə modelinin mərhələli şəkildə kompüter əsaslı formata keçirilməsidir. Bu isə daha çevik, şəffaf və effektiv qiymətləndirmə mexanizminin qurulmasına xidmət edir.