Özündən böyüklərə qalib gəldi: Əvvəl gümüş, sonra qızıl

Özündən böyüklərə qalib gəldi: Əvvəl gümüş, sonra qızıl 

İsmayıllının sakit və yaşıllıqlarla əhatələnmiş səliqəli küçələrində bir məktəbli addımlayır. O, sadəcə məktəb yollarında deyil, uğur pillələrində də irəliləyir.

"Azərbaycan müəllimi" İsmayıllı rayonunun uğurlu məktəblilərindən olan Nazlı Mirzəliyevanın uğur hekayəsini oxucularla bölüşür.

İsmayıllı şəhəri N.Behdiyev adına 6 nömrəli tam orta məktəbin 9-cu sinif şagirdi Nazlı Mirzəliyeva sıradan bir məktəbli deyil. O, təhsilə olan sevgisi, zəhmətkeşliyi və qarşısına qoyduğu məqsədlərə olan sadiqliyi ilə həm müəllimlərinin, həm də həmyaşlarının rəğbətini qazanıb. Bu il "Ən yaxşı təqdimat" müsabiqəsindəki çıxışı ilə diqqət mərkəzində olub. O, "Heydər Əliyev və azərbaycançılıq məfkurəsinin ideologiya səviyyəsinə yüksəldilməsi" mövzusunda hazırladığı təqdimatla müsabiqədə II yerə layiq görülüb.

Bu uğura gedən yol isə heç də təsadüfi olmayıb. Nazlı oktyabr ayından bu təqdimata ciddi şəkildə hazırlaşmağa başlayıb. Heydər Əliyevin irsini öyrənmək, onun siyasi baxışlarını və azərbaycançılıq məfkurəsini dərindən anlamaq ona böyük maraq və ilham verib.

Onun uğurları yalnız təqdimat müsabiqəsi ilə yekunlaşmır. Respublika fənn olimpiadalarında Azərbaycan dili və ədəbiyyat fənni üzrə göstərdiyi nəticələr hər kəsin diqqətini çəkib. Ötən il 8-ci sinifdə oxuyarkən 9-cu siniflərlə yarışaraq RFO-nun gümüş medalçısı olan Nazlı bu il məqsədini daha da yüksəldib: medalının əyarını dəyişmək. O, bu arzusuna çataraq builki olimpiadada qızıl medalla təltif olunub.

Təcrübə və zəhmət onun əsas silahları idi. Artıq keçən ildən əzbərlədiyi materiallar, qazandığı təcrübə bu il işini xeyli asanlaşdırıb. Həmsöhbətim uğurlarını təkbaşına qazandığını düşünmür. O, ailəsinin və müəllimlərinin dəstəyini yüksək qiymətləndirir. Fənn müəllimi ilə yanaşı, digər müəllimlərinin də ona inandığını və uğur yolunda ruhlandırdığını minnətdarlıqla qeyd edir.

Gələcək planlarından danışarkən isə gözlərində parıltı yaranır. O, hüquq təhsili almağı qarşısına məqsəd qoyub. Artıq indidən bu sahədə müəyyən layihələrdə iştirak edir, hüquqi biliklərini artırmaq üçün araşdırmalar aparır. Üstəlik, rayonun "Uşaq səfirlər məclisi"nin nümayəndəsi kimi uşaq hüquqları ilə bağlı fəal mövqe tutur və bu mövzunu dərindən öyrənməyə çalışır.

Yaşıdlarına tövsiyələr

Müsahibimiz yaşıdlarına da dəyərli tövsiyələr verir:

"Əsas məsələ təcrübəli insanlarla ünsiyyətdə olmaqdır. O yolu keçmiş insanlara baxanda insan ruhlanır. Amma təkcə çox çalışmaq yox, sistemli və keyfiyyətli çalışmaq vacibdir".

Boş vaxtlarında isə idmanla məşğul olur, mütaliə edir və müxtəlif mövzularda araşdırmalar aparmaqdan zövq alır. Onun fikrincə, insanın həyatda uğur qazanması üçün ilk növbədə məqsədi olmalıdır:

“Məqsədi olan insanın həyata olan eşqi artır, o da bu yolda əlindən gələni edir,” – deyə bildirir.

Nazlı həmçinin bədii gimnastika ilə də ciddi şəkildə məşğul olur. Bu sahəyə uşaq yaşlarından maraq göstərib və zamanla onu təhsili ilə uğurla birləşdirə bilib:
"Uşaq yaşlarımdan bədii gimnastika ilə məşğul olmuşam. Deyərdim ki, məni hərtərəfli inkişaf etdirən əsas faktor elə budur. Həm rayonumu, həm də respublikamı ölkədən kənarda təmsil etmişəm. Komanda yoldaşlarımla Gürcüstanda keçirilən “Gimnastika hamı üçün” yarışda qızıl medala layiq görülmüşük. İdman təkcə səhhətimə müsbət təsir etmədi, eyni zamanda, psixoloji cəhətdən məni inkişaf etdirdi, komanda şəklində işləməyi, bir-birimizə dəstək olmağı öyrətdi".

O qeyd edir ki, təhsil aldığı məktəb 2021-ci ildə yenidən təmir olunub. Məktəbin binasında şagirdlər üçün yaradılmış müasir şəraitə görə Heydər Əliyev Fonduna öz təşəkkürünü bildirir. Yaradılmış geniş imkanların və yüksək şəraitin ona və onun timsalında bütün şagirdlərə ilham verdiyini və bu etimadı doğrultmaq üçün daha da çox çalışdıqlarını bildirir.

Ədəbi-bədii ədəbiyyata olan marağı, dünya klassiklərinin və Azərbaycan ədiblərinin yaradıcılığına olan sevgisi onun bu sahədəki uğurlarına əlavə güc qatıb. Dili daha yaxşı öyrənmək və onu gələcək nəsillərə düzgün şəkildə çatdırmaq arzusu ilə öz üzərində yorulmadan çalışır.

Nazlının uğur hekayəsi bizə göstərir ki, əzm, məqsəd və inamla istənilən uğura nail olmaq mümkündür. O, kiçik addımlarla böyük uğurlara imza atan gənc bir liderin parlaq nümunəsidir.